Героїчна боротьба киян проти татаро-монгольських завойовників (1240 р.)

Матеріал з Київський столичний університет імені Бориса Грінченки
Перейти до: навігація, пошук
Облога Києва монголо-татарами

В лето1 6748. Приде Батый Киеву в силе тяжьце, многомь множьством силы своей, и окружи град и остолпи сила Татарськая, и бысть град во обьдержаньи велице. И бе Батый у города и отроци его обьседяху град, и не бе слышати от гласа скрипания телег его, множества ревения вельблуд его, и рьжания от гласа стад конь его. И бе исполнена земля руская ратных. Яша же в них Татарина, именемь Товрул, и т исповеда им всю силу их; се бяху братья его силныи воеводы: Урдюй, Байдар, Бирюй, Кайдан, Бечак, н Меньгу, и Кююкь иже вратися уведав смерть канову и бысть каномь, не от роду же его, но бе воевода его перьвый, се Бедяй богатур и Бурунъдяй багатырь, иже взял Болгарьскую землю и Суждальскую; инех бес числа воевод, их же не исписахом зде. Постави же Баты порокы городу, подъле врат Лядьскых, ту бо беаху пришли дебри; пороком же беспрестани бьющим день и нощь, выбиша стены, и возиидоша горожани на избыть стены и ту беаше видити лом копейны и щет скепание, стрелы омрачиша свет побеженым; и Дмитрови ранену бывшу, взиидоша Татаре на стены и седоша того дне и нощи. Гражане же создаша пакы другий град, около святое богородице. Наутрея же придоша на не, и бысть брань межи ими велика; людем же узбегшим на церковь и на комары церковныя, и с товары своими, от тягости повалишася с ними стены церковныя, и прият бысть град сице воими. Дмитрея же изведоша язвена и не убиша его, мужьства ради его. В то же время ехал бяше Данил во Угры королеви, и еще бо бяшеть не слышал прихода поганых Татар на Кыев. Батыю же вземшю град Кыев и слышавшу ему о Даниле, яко в Угрех єсть, поиде сам Володимерю и приде к городу Колодяжьну, и постави порока2 и не може разбита стены, и начат перемолъвливати люди; они же, послушавше злого с[ъ]вета его, передашася и сами избити быша. И приде Каменцю, Изяславлю, взят я; видив же Кремянець и град Данилов, яко невозможно прияти ему и отъиде от них3; и приде к Володимерю, и взя и копьемь и изби и не щадя, такоже и град Галичь, иныи грады многы, им же несть числа. Дмитрови, Кыевьскому тысяцкому Данилову; рекщу Батыеви: “не мози стряпати в земле сей долго, время ти есть на Угры уже пойти; аще ли встряпаеши, земля ти есть силна сберуться на тя и не пустять тебе в землю свою”; про то же рече ему, види бо землю гибнущу Рускую от нечестиваго. Батый де послуша с[ъ]вета Дмитрова, иде во Угры<...>

1.Лето - рік.
2.Порок – облогова машина на зразок тарану.